აზერბაიჯანი მზად არის გააძლიეროს ბრძოლა არალეგალური ონლაინ აზარტული თამაშების წინააღმდეგ, მას შემდეგ, რაც პრეზიდენტ ილჰამ ალიევის მიერ ხელმოწერილი განკარგულებით ეროვნული კიბერუსაფრთხოების სააგენტო (MKA) შეიქმნა.

სააგენტო (MKA) მიიღებს ზომებს ქვეყანაში არალიცენზირებული სათამაშო პლატფორმების ფუნქციონირების აღსაკვეთად. უწყების საქმიანობის საერთო მართვისა და ზედამხედველობის უზრუნველსაყოფად შეიქმნება დირექტორთა საბჭო, რომელიც თავმჯდომარისა და სამი მოადგილისგან იქნება დაკომპლექტებული.

ეს ნაბიჯი მას შემდეგ გადაიდგა, რაც აზერბაიჯანის ცენტრალურმა ბანკმა (CBA) შეშფოთება გამოხატა არალეგალური აზარტული თამაშების საშუალებით საზღვარგარეთ მილიონობით მანათის გადინების გამო.

ცენტრალური ბანკის თავმჯდომარემ, თალეჰ კაზიმოვმა აღნიშნა: „საზღვარგარეთ უზარმაზარი თანხები ირიცხება. ზოგიერთი ფიზიკური პირი საბანკო ბარათებზე ანგარიშებს სპეციალურად იმისთვის ხსნის, რომ საზღვარგარეთ აზარტულ თამაშებში მიიღოს მონაწილეობა. მსგავსი გადახდების მოცულობა მილიონობით მანათს აღწევს. ჩვენ ეს უნდა აღვკვეთოთ“.

მან ასევე დასძინა, რომ ფინანსური სექტორი არ უნდა ასრულებდეს შუამავლის როლს უკანონო სახსრების მოძრაობაში და ვალდებულია მსგავსი აქტივობების შესახებ ფინანსური მონიტორინგის სამსახურს შეატყობინოს.

მიუხედავად იმისა, რომ ხელისუფლება არალეგალურ აზარტულ თამაშებს ებრძვის, ქვეყანაში პირველი ინტეგრირებული კურორტის (კაზინო-კურორტის) შექმნის წინადადებებიც განიხილება. გასულ წელს აზერბაიჯანის პარლამენტმა დაამტკიცა კანონმდებლობა, რომელიც კასპიის ზღვის ხელოვნურ კუნძულებზე კაზინო-კურორტების მოწყობის ნებას რთავს.

აზერბაიჯანელმა ბიზნესმენმა, ემინ აგალაროვმა განაცხადა, რომ გეგმავს დიდი კომპლექსის აშენებას ბაქოს მახლობლად მდებარე საკურორტო ქალაქ „Sea Breeze“-ში. გავრცელებული ინფორმაციით, პროექტი 90,000 კვადრატულ მეტრზე მეტ ფართობს მოიცავს და მასში 100-ზე მეტი სათამაშო მაგიდა და 1,500-ზე მეტი სათამაშო ავტომატი განთავსდება. კაზინოს გარშემო კი 10 ბრენდირებული სასტუმრო და საკონცერტო დარბაზი აშენდება.

წყარო

#აზერბაიჯანი #აზარტულითამაშები #რეგულაცია #კიბერუსაფრთხოება #სათამაშოინდუსტრია #ინდუსტრიისსიახლეები #ეკონომიკა #კანონმდებლობა